I pranishëm në Shkodër, ku është pritur dhe shoqëruar tërë kohën nga një turmë njerëzish që thërrisnin ‘Rama Ik’, kreu i PD-së Lulëzim Basha ka deklaruar se Ramën e ka kapur trishtimi i humbjes, ndaj vjell vetëm vrer, por më 25 prill, kjo do të marrë fund, pasi shqiptarët do votojnë Bashën dhe alternativën e tij të shpresës.
Pyetjes së gazetarit se a varej ai prej Metës dhe Berishës siç thotë Rama, Basha u përgjigj: Aaa, shiko sa i mjerë është ai që e ka humbur toruan dhe e ka kapur dëshpërimi i humbjes. Ai është i lidhur me zinxhirët e krimit e të korrupsionit tash 8 vjet. Është strumbullari i çdo te keqeje që ka pësuar Shkodra dhe e gjithë Shqipëria dhe tani që po i vjen fundi, ditë për ditë, vetëm vjell vrer, kjo është alternativa e Edi Ramës. Alternativa ime është alternativa e shpresës, e ndryshimit, është alternativa e shërbimit ndaj çdo shqiptari dhe çdo shqiptareje, pavarësisht bindjeve politike, është alternativa e fitores. Shqiptarët janë një shoqëri normale me një qeveri jo normale. Kjo do marrë fund më 25 prill. Edi Rama do largohet, PD dhe koalicioni ynë do qeverisë vendin dhe unë kam një angazhim përpara shkodranëve dhe gjithë shqiptarëve: nëse nuk i mbaj zotimet e planit tim brenda 4 viteve, nuk do kërkoj një mandat të dytë. Nuk ka shqiptar që nuk e di kush i ka vjedhur dhe i ka varfëruar këto 8 vite. Edhe këto ditë të fundit, përpara se shqiptarët ta largojnë me votën më referendare që ka njohur ndonjëherë pluralizmi. Ai vazhdon të bashkëpunojë më kriminelët. E patë ç’ndodhi në Elbasan? Ai ka policinë, ai ka shtetin, ai ka kontrollin e gjithçka, shërbimin sekret e të gjitha, e prapë se prapë nuk hyn dot në qytete pa praninë e bandave. Ekipi ynë është ekipi i fitores dhe është i përbërë nga njerëz me integritet e nga mijëra të tjerë që janë të gatshëm të marrin përgjegjësi.
