Komisioni për Ankimimet dhe Sanksionet pranë KQZ (KAS), ka nisur prej thuajse një jave shqyrtimin e kërkeseve ankimore të subjekteve zgjedhore, të cilat janë të pakënaqura nga rezultatit i shpallur prej KQZ-së pas votimit të 25 prillit.
Anëtarët e Komisionit për Ankimimet dhe Sanksionet, KQZ.
Në seancat e zhvilluara me këtë qëllim, KAS ka shqyrtuar deri më tani kërkesën ankimore nr. 32 që lidhej me votimin në qarkun e Vlorës, ato me numrat 33, 41 dhe 52, të cilat lidheshin me vlefshmërinë e votimeve në zonën e Gjirokastrës, si dhe ato me numër 34, 35, dhe 42, të cilat kishin në qendër vlefsshmërinë e votimeve në zonën e Beratit.
Deri më tani nga shqyrtimi i provave sjellë prej përfaqësuesëve të subjekteve zgjedhore pranë KQZ, KAS ka vendosur të mos kalojë për shqyrtim kërkesën ankimore nr. 32 lidhur me qarkun e Vlorës, të pranojë provat e depozituara nga subjektet në KQZ për ankimimet me numër 33, 41, 52, të rrëzojë kërkesat e PD-AN dhe LSI për marrjen e provave nga institucionet apo entet e tjera publike, si dhe ka kërkuar nga administrata e KQZ-së të verifikojë nëse kanë qenë pjesë e administratës zgjedhore emrat e shtetasve të depozituar nga LSI, e po ashtu edhe këqyrjen e të dhënave të pajisjeve elektronike (PEI) që u përdorën gjatë votimit, për kryqëzimin e të dhënave për qarkun Gjirokastër, duke e pezulluar kështu vendimmarrjen për të trija kërkesat ankimore paraqitur para tij, deri në ardhjen e dy provave kërkuar nga administrata e KQZ-së.
Ndërkaq, pas shqyrtimit të kërkesave ankimore me numër 34,35, dhe 42, dhe dëgjimit të pretendimeve të subjekteve ankuese, KAS vendosi të marrë në cilësinë e provës të gjitha materialet zgjedhore që gjenden në 24 kutitë e qendrave të votimit Berat, duke refuzuar sërish kërkesën e koalicionit PD-AN, për marrjen e provave apo informacioneve shtesë nga institucionet dhe entet e tjera, e duke vënë në dispozicion, në cilësinë e provës, edhe të dhënat e kryqëzuara nga paisjet e elektronike të identifikimit të zgjedhësve për zonat zgjedhore të qarkut Berat, për të mundësuar evidentimin e rasteve të votimit të dyfishtë ose familjar, sipas kërkesës së koalicionit PD – AN.
Po cilët janë pretendimet e koalicionit PD-AN, teksa kërkon përsëritjen e zgjedhjeve në disa qarqe e zona?
Në Komisionin e Ankimimeve dhe Sanksioneve, përfaqësuesit e koalicionit parashtruan një sërë arsyesh, si blerjen masive e votës nëpërmjet individëve me rekorde kriminale, dhënien e mbi 10 mijë lejeve legalizimi përpara zgjedhjeve, punësimin e përkohshëm të më shumë se 13.000 punonjësve të rinj në administratën qëndrore, 63 milionë euro paga shtesë, shtimin e ndihmave ekonomike me rreth 2.5 milionë euro, me shume së 125 milionë euro pagesa për tërmetin shpërndarë përpara zgjedhjeve, rreth 83 mijë fletë votimi të pavlefshme, për hir të ndryshimit të modelit të fletës së votimit në çastin e fundit, mosvotimin e 523 mijë qytetarëve për hir të kovidit, përdorimin pa autorizim nga qytetarët, të mbi 910 mijë të dhënave personale si dhe përdorimin e tyre për fushatën elektorale të Partisë Socialiste.
