Shtetet e Bashkuara të Amerikës kanë paralajmëruar Rusinë se do të këtë pasoja nëse aktivisti i opozitës Alexei Navalny vdes në burg. Edhe Mbretëria e Bashkuar, Franca, Gjermania dhe Bashkimi Europian, kanë shprehur shqetësimin për mënyrën si po trajtohet ai. Mjekët e Navalnit thonë që ai “do të vdesë mjaft shpejt”, nëse nuk i jepet urgjentisht ndihmë mjekësore për dhimbjen e fortë në shpinë dhe problemin me këmbët.
Ambasadori rus në Mbretërinë e Bashkuar, tha se Navalny është në kërkim të vëmendjes dhe “nuk do lejohet të vdes në burg”.
Kritiku i fortë i presidentit Vladimir Putin, 44 vjecari Alexey Navalny, u burgos në shkurt për hir të akuzave të shkuara, të cilat sipas tij janë të motivuara politikisht. Më 13 mars, ai nisi një grevë urie për të protestuar ndaj faktit që s’mund të takohej me mjekët e vet, ndërkohë që mjekët thonë se rezultatet e fundit të analizave dëshmojnë se ai mund të ketë probleme me veshkat apo arrest kardiak në cdo moment.
Liderat e Unionit Europian do diskutojnë të hënën mbi këtë cështje dhe Josep Borrell, diplomati më i lartë I bllokut, deklaroi se Unioni Europian është tejet i shqetësuar, duke u kërkuar autoriteteve të burgut t’i mundësonin menjëherë kontaktin me ekipin mjekësor Navalny-t. Sipas së shoqes, deri më tani, Navalny ka humbur rreth 9 kg që prej fillimit të grevës.
