Është shoqëruar me debate të forta dëshmia e kreut të Bashkisë së Tiranës, Erion Veliaj, në Komisionin Hetimor mbi Inceneratorët, zhvilluar ditën e djeshme në zyrat e Kuvendit të Shqipërisë.
I pyetur nga drejtuesja e këtij komisioni, deputetja demokrate Jorida Tabaku, se a i njihte tri personat që akuzohen për monopolizimin e inceneratorëve të Elbasanit, Fierit dhe Tiranës dhe praktikimin e një skeme abuzimi të përdorimit të tyre, Veliaj iu përgjigj “se nuk i njihte nga afër”, por vetëm si figura krah emrave më në zë të PD-së, në kohën kur ajo kishte qenë në pushtet.
Dëshmia e Veliajt është shoqëruar prej një kakofonie dhe akuzash të ndërsjellta, me këmbënguljen nga ana e Tabakut se ai po gënjente mbi faktet dhe dëshminë që po jepte, e me replikat e Veliajt që hidhte poshtë akuzat e bëra prej PD-së, se kishte firmosur në emër të Qarkut Tiranë kur ai qe thjesht kryetar i një bashkie,, se nuk kishte pyetur Këshillin Bashkiak për tokën ku do të ngrihej inceneratori, e se kishte favorizuar treshen e shumë përfolur Mërtiri-Zoto-Gugallia, duke i dhënë udhë skemës abusive.
Përgjatë citimeve të ligjeve të ndryshme e të shkresave nga të dyja palët, të cilat në në fakt thjesht e hermetizonin debatin në gjëra që publiku e ka të pamundur t’i verifikojë, nuk mbeti pa u përmendur as emri i kreut të qeverisë Edi Rama, të cilin Tabaku e cilësoi si bekimtarin e tërë kësaj situate, cilësim të cilit Veliaj iu përgjigj se në fakt ai me Ramën qenë një, dhe kjo ishte në fakt edhe fatkeqësia e PD-së.
Unë me Edi Ramën, tha Veliaj, e kam thënë disa herë, jemi një. Dhe kur marrim vendime, dhe kur pastrojmë qytetin, edhe kur bëjmë piramidën, edhe kur bëjmë Pazarin e Ri dhe kur bëjmë Bulevardin e Ri… Nuk jemi si ju, që i digjnit njerëzit të gjallë aty, tek Bulevardi i Ri. Marrëdhënia ime e mirë me Edi Ramën, ëshë fatkeqësia juaj, tha Veliaj mes të tjerave gjatë dëshmisë në Komisionin e ngritur për aferën e Inceneratorëve në Kuvend.
