Kreu i Policisë së Shtetit Gledis Nano ka nënshkruar ditën e sotme një marrëveshje me një nga laboratorët e analizave në Tiranë, për të testuar nëse ata janë apo jo përdorues të lëndëve narkotike. E tëra kjo deklaroi Nano, bëhej për të çertifikuar rritjen e standardit dhe integritetit personal të policëve, e po ashtu edhe për të eleminuar zërat dashakeqë ndaj Policisë së Shtetit.
Marrëveshja e bashkëpunimit konsiston në krijimin e mundësive për ekzaminimin mjekësor periodik të punonjësve të Policisë së Shtetit, në kuadër të rritjes së standardeve dhe integritetit personal, për të ndaluar përdorimin e lëndëve narkotike nga ana e tyre, thuhet në deklaratën zyrtare të Policisë së Shtetit.
Drejtor Nano ka falënderuar administratorin e laboratorit, pasi kjo mundësi e ofruar nga ana e tyre është shumë e vlefshme për rritjen e imazhit të Policisë në komunitet dhe për fitimin e besimit të qytetarëve, sepse kryerja e testit periodik për përdorimin e lëndëve narkotike do të eliminojnë akuzat e dashakeqësitë ndaj Policisë së Shtetit.
“Ju falënderoj për këtë mundësi dhe ftoj edhe kompani të tjera në këtë fushë dhe jo vetëm, që të ndihmojnë Policinë e Shtetit”, – u shpreh Drejtor Nano.
Gjatë nënshkrimit të marrëveshjes, Drejtor Nano i ka kërkuar përfaqësuesit të laboratorit, paanshmëri, garanci maksimale në kryerjen e këtij testi dhe ruajtje të konfidencialitetit të të dhënave.
