Teksa ka njoftuar për një sërë vjedhjesh të kartave pëgjatë blerjeve në internet, në kuadër edhe të nismës SellSafe, Policia e Shtetit udhëzon qytetarët se si të mbrohen nga mashtruesit në rrjet.
Sigurohuni që të gjithë punonjësit tuaj të jenë të vetëdijshëm për çështjet e mashtrimit që prekin dyqanet në rrjet, thuhet në njoftimin e saj. Qëndroni të përditësuar mbi llojet e mashtrimeve të pagesave në rrjet që prekin këto lloj biznesesh dhe sigurohuni që të keni mjetet në dispozicion për t’i parandaluar ato. Institucionet e sigurisë, por dhe bankat me të cilat bashkëpunoni do të kenë detaje mbi llojet e mashtrimit të pagesave në rrjet. Kontaktojini! Njihini klientët tuaj, në mënyrë që të jeni në gjendje të verifikoni pagesat e tyre, thuhet në njoftimin e Policisë.
Ndërkaq për blerësit në rrjet, këshillat e Policisë janë:
Asnjëherë mos dërgoni me e-mail numrin e kartës suaj, PIN-in ose ndonjë informacion tjetër të kartës;
Asnjëherë mos i dërgoni para dikujt që nuk e njihni;
Ruani gjithmonë të gjitha dokumentet që lidhen me blerjet tuaja në rrjet Nëse nuk po blini asgjë, mos i paraqitni të dhënat e kartës suaj;
Mes orientimeve të tjera të Policisë së Shtetit, qe edhe këshilla që qytetarët duhet të bëjnë kujdes, pasi grupet kriminale i përsosin vazhdimisht metodat e mashtrimeve në rrjet.
Që nga fillimi i pandemisë, thuhet më tej në njoftim, shumë bizneseve u është dashur të hyjnë në rrjet, për të vazhduar aktivitetet e tyre. Kjo ka bërë që shumë qytetarë të përdorin shërbimet në rrjet disa herë në periudha të shkurtra dhe gjithnjë e më shume blerjet po kryhen në këtë formë, gjë ka rritur mundësinë e sulmeve nga kriminelet kibernetike. Informohuni në vazhdimësi rreth mënyrave të reja të mashtrimit në rrjet, pasi kriminelët kibernetikë në vazhdimësi ndryshojnë format e tyre të veprimit, thuhet mes të tjerave në njoftimin e Policisë së Shtetit.
