Një ngjarje e rëndë është shënuar në zonën e Lungomares, Vlorë ku një qen i racës ‘pitbull’ ka kafshuar në rrugë një fëmijë 4-vjeç. Vogëlushja u shpëtua nga një punonjës që ndodhej aty pranë.
Një vajzë e vogël 4-vjecare u kafshua nga një qen pitbull në Vlorë teksa ecte në Lungomare me gjyshërit. Për ta shpëtuar ndërhyri një punëtor rruge dhe një djali i ri kalimtar. E vogla u dërgua me urgjencë në spital dhe iu nënshtrua një ndërhyrjeje kirurgjikale, pasi qeni e kafshoi në kokë dhe në qafë.
Sejko Veliu ndali punën në rrugë për një moment dhe zgjodhi t’i bëjë një fotografi një vajze të vogël që ecte dorë për dore me gjyshërit.
“Erdhën të dy gjyshi me gjyshen, i mora hajt tu bëj një foto Sejkoja, ik i thashë zoti të bëj mbretëreshë. Kaq i thashë unë”, thotë ai.
Por sapo kanë bërë disa hapa më tutje në shëtitjen e tyre buzë detit në Lungomare, një qen i racës pitbull sulmoi vajzën e vogël.
“Ikën qeni po vinte andej, një ta mbërthyer te koka”, shton ai.
Fati deshi që ai të shinte situatën dhe të ndërhynte pa vonesë për ta shpëtuar fëmijën nga qeni agresiv, bashkë me një tjetër të ri, edhe ai kalimtar i rastësishëm.
“E pashë mu veshën sytë e kapa qenin e lidha me zinxhirë te shtylla, e kapi në kokë, do kishte vdekur ajo. Fati që vajta unë dhe thashë çfarë pati. Qeni rrugës marr vesh unë nga këta pitbullët e mëdhenj. Ne punojmë këtu, kjo ishte rastësi”, thotë Sejko.
Qytetarët e tjerë lajmëruan policinë dhe ambulancën. Fëmija u transportua në spital me plagë në kokë dhe iu nënshtruar një ndërhyrje kirurgjikale në kokë.
“Kishim dalë buzë detit, e kisha vajzën përdore. E pashë qenin, bëri sikur iku dhe më pas erdhi dhe iu hodh vajzës”, tha gjyshja e vogëlushes pas ngjarjes.
Raportimet për ngjarjen janë ende paraprake, por mësohet se deri më tani nuk janë identifikuar pronarë të pitbullit, për të cilin disa banorë të zonës shprehen se ka disa ditë që e shohin në rrugë. Dyshimet janë se ai mund të jetë braktisur dhe pritet ndërhyrja e veterinerit për largimin e qenit.
