Universiteti i Oksfordit sapo ka publikuar kryefjalën për vitin 2024. Ai është “kalbja e trurit” dhe shënon degradimin e plotë të kapacitetit intelektual, për hir të konsumit të materialeve të banale ose jo me vlerë”.
Por çfarë do të thotë “kalbje e trurit”, sipas Universitetit të Oxfordit?
Sipas studiuesëve të këtij universiteti, “kalbja e trurit është përkeqësimi i supozuar i gjendjes mendore ose intelektuale të një personi, kryesisht si rezultat i mbikonsumit të materialeve (veçanërisht përmbajtjeve në internet), që konsiderohen si të parëndësishëm ose të pavlera. E po ashtu edhe diçka e konsideruar si e mundshme për të shpënë në një përkeqësim të tillë.
Pse u zgjodh si kryefjalë “kalbja e trurit”?
Nga sa bëhet me dije në faqen zyrtare të këtij universiteti, ky togfjalësh u zgjodh togfjalësi i vitit, për hir se ekspertët e kishin pikasur shpesh këtë term për të përkufizuar shqetësimet që sillte konsumi i tepërt i materialeve në internet.
“Pas mbi 37,000 votave, diskutimeve publike në mbarë botën dhe analizës së të dhënave tona gjuhësore, ne kemi emëruar ‘kalbjen e trurit’ si kryefjalën tonë të vitit për 2024”, shkruhet aty. “Ekspertët tanë vunë re se ‘kalbja e trurit’ fitoi tjetër rëndësi këtë vit, si një term i përdorur për të shënuar shqetësimet nga konsumi i sasive të tepërta të përmbajtjeve me cilësi të ulët në internet, veçanërisht në mediat sociale. Përdorimi i termit u rrit me 230% midis 2023 dhe 2024. Përdorimi i parë i regjistruar i ‘kalbjes së trurit’ u gjet në vitin 1854 në librin “Walden” të Henry David Thoreau, por ka marrë një rëndësi të re si shprehje në epokën dixhitale”, thuhet më tej në sqarimin e dhënë prej këtij universiteti.
