Deputetja e Partisë së Lirisë Monika Kryemadhi, në deklaratën e djeshme përpara gazetarëve, pas daljes prej seancës ku do të jepej vendimi mbi ish bashkëshortin e saj, ish presidentin Meta, ka dekalruar se Ilir Meta nuk ka bërë asgjë nga ato për të cilat akuzohet.
Sipas asaj që deklaroi Kryemadhi, të tëra akuzat prej SPAK-ut kanë lidhje vetëm me të, e aspak me Ilir Metën.
“Qëndrimi im dhe argumenti im, për hir të së vërtetës, është që për çdo gjë që akuzohet Ilir Meta, nuk ka asnjë lloj lidhje. Aty u vërtetua që çështja Çez-Dia e Ilir Metës ka filluar në janar të 2018-s. Pra do të thotë që dosja ka gjashtë vjet. Duke qenë që nuk kanë pasur asgjë për Çez-Dian e kanë bashkuar me akuzat e mia dhe me thënë të drejtën, ishte shumë qesharake kur prokurori tha që Monika Kryemadhi e ka hequr mitrën në 27 maj të 2019-s, në bashkëpunim me Ilir Metën. Tani Ilir Meta nuk është as kirurg…Kjo është prokuroria dhe drejtësia. Dhe e dyta, ia sqarova prokurorisë dhe gjyqtarit të gjitha, dhe me thënë të drejtën u shokua, por nuk e ka forcën të ndryshojë vendimet e Prokurorisë, për të gjitha gjërat që akuzohet Monika, por që mbajnë në burg Ilir Metën. Nuk është problemi që Ilir Meta është i rrezikshëm. Duan ta bëjnë, le ta bëjnë me urdhër të Edi Ramës. Unë me thënë të drejtën do kisha qejf të ma bënin një herë në javë detyrim-paraqitjen që të bëja javë përjavë nga një konferencë shtypi këtu. DO ta bëj muaj për muaj, kështu që, një herë në muaj do takohemi këtu.
Unë sapo i thashë avokatit Genc Gjokutaj, që ti nuk je avokat serioz, se ti duhet të kërkoje burgim për mua dhe detyrim paraqitjeje për Metën. Këto që i kanë ngritur janë absurditete.
Unë ia kërkova edhe Prokurorisë, që kjo çështje duhej të ishte e ndarë. Se Prokuroria ishte prokovokative, se të na bashkosh në një sallë, kur ne jemi në një konflikt të hapur, është absolutisht për të na provokuar dhe për të bërë një shoë. Por e kanë bashkuar çështjen ÇEZ-DIA, se po t’i linin veç e veç, ÇEZ-DIA do t’u binte.
I ka pyetur prokuroria Edi Ramën, Milena Harriton, Eglantina Gjermenin, për telefonin tim? Kam përshtypje që atë e ka thirr Edi Rama, i kanë parë bashkë mesazhet, i janë kujtuar kohët e vjetra, i janë kujtuar thashethemet që kemi bërë, i janë kujtuar, se kështu është kur të zënë haqet, kur kemi gënyer Ilir Metën për të bërë Erjon Velinë Kryetar Bashkie. Që mu thaftë goja dhe dora bashkë!”, u shpreh Kryemadhi.
