Në prezantimin e projektbuxhetit 2023 ministrja e Ekonomisë dhe Financave Ibrahimaj ka deklaruar se pjesë e ndryshimeve të ligjit të ri të tatimit mbi të ardhurat, do të jenë edhe furnizuesit e shërbimeve si profesione të lira, të cilët janë rregjistruar si person fizik, e që pritet të shtojnë në buxhetin e shtetit mbi 2 miliardë lekë në vit. Me këtë lëvizje, u shpreh Ibrahimaj, synohet dekurajimi i disa fenomenve që përpiqen të reduktojnë barrën fiskale.
Paketa Fiskale përmban disa masa si ndryshime dhe miratimi i ligjit të ri të Tatimit mbi të Ardhurat, u shpreh Ibrahimaj. Projektligji i ri që prezantohet, ka synuar përmirësimin e sistemit të taksimit të individëve dhe entiteteve ligjore në Shqipëri, forcimin e parimit të neutralitetit në sistemin tatimor shqiptar, përafrimin gradual të sistemit të tatimit të të ardhurave në Shqipëri me parimet e Direktivave të BE-së në lidhje me tatimin e të ardhurave dhe kapitalit, adresimin e mangësive dhe boshllëqeve legjislative të konstatuara gjatë periudhës 22 vjeçare të aplikimit të ligjit ekzistues, duke synuar funksionimin e një sistemi tatimi më të drejtë dhe stimulues, më të ndershëm dhe të gjithëpranuar
Në kuadrin e këtij ligji kemi ndryshimet dhe efektet e mëposhtme:
Rritja e kufirit të patatueshëm të pagës nga 40 mijë lekë në 50 mijë lekë, i cili pavarësisht se do reduktojë të ardhurat në buxhet për rreth 1 deri 1,2 miliardë në vit, por nga ana tjetër do rrisë të ardhurat e punëmarrësve me paga deri në 50 mijë lekë në muaj, me rreth 1 miliard lekë, çka do të thotë më shumë konsum. Nga kjo masë përfitojnë mbi 70 mijë punëmarrës, të cilët janë në grupin e pagave nga 40 në 50 mijë lekë në muaj.
Futja në skemën e taksimit të të ardhurave personale të furnizuesve të shërbimeve si profesione të lira, vlerësohet të kontribuojë në buxhetin e shtetit me mbi 2 miliardë lekë në vit. Janë mbi 14 mijë profesione të regjistruara me statusin e personit fizik, të cilat do të jenë subjekt i tatimit, duke ndikuar në këtë mënyrë: (i) në dekurajimin e fenomenit të kalimit nga listëpagesa me statusin e të punësuarit dhe me barrë fiskale progresive 13 % dhe 23 %, tek personi fizik i vetëpunësuar me barrë fiskale 0 %, si dhe në (ii) eliminimin e praktikave të transferimit brenda vendit të fitimit nga personat juridikë subjekt i tatimit mbi fitimin 15 % tek personat fizikë të vetëpunësuar me shkallë tatimore 0 %, nëpërmjet faturimit të shërbimeve.
Më lejoni të theksoj se tatimi për bizneset e vogla që ushtrojnë veprimtari në fushën e tregtisë, prodhimit, transportit, artizanatit etj, të organizuara si persona fizikë tregtarë, por edhe SHPK, dhe që realizojnë xhiro deri në 14 milionë lekë do të vijojë të jetë 0 % deri në fund të vitit 2029.
