Pak orë pas betimit të tij, presidenti i ri amerikan Donald Trump, iu fut menjëherë punës, për nxjerrjen e direktivave të para. Ato përfshijnë daljen e SHBA nga OBSH-ja, shpëtimin e TikTok-ut dhe heqjen e sanksioneve kundër kolonëve në Bregun Perëndimor.
Presidenti i ri i Shteteve të Bashkuara, Donald Trump, siç edhe u njoftua, pak minuta pas betimit, nënshkroi dekretet e para dhe emërimet zyrtare të administratës së tij të re, në prani të zëvendës presidentit JD Vance dhe udhëheqësit e Kongresit. Në orët e vona të pasdites, ai nënshkroi një seri prej shtatë urdhrash të tjerë ekzekutivë, duke përfshirë edhe revokimin e 78 ligjeve të nxjerra nga Joe Biden.
Shfuqizimi i 78 ligjeve të miratuara nga Biden/ Ndër ligjet e Bidenit, ishte edhe një urdhër ekzekutiv që i detyroi agjencitë federale të zgjeronin ndalimet për diskriminimin gjinor; një urdhër që kërkonte nga të emëruarit e degës ekzekutive, të nënshkruanin një zotim etik; një urdhër që i lejonte transgjinorët të shërbenin në ushtri; dhe një urdhër që ndalonte rinovimin e kontratave me burgjet private.
Dalja nga Marrëveshja e Parisit për Klimën/ Më pas Trump firmosi urdhrin ekzekutiv për daljen e Shteteve të Bashkuara nga Marrëveshja e Parisit për Klimën. “Ne do të kursejmë tri miliardë dollarë,” u shpreh ai.
Rregullat e reja për agjencitë federale/ Ndër urdhrat e firmosur, është po ashtu një direktivë për agjencitë federale, për trajtimin e çështjes së kostos së jetesës, ndalimin e rregulloreve të reja dhe punësimin nga qeveria federale (me përjashtim të Pentagonit), deri në një njoftim të mëtejshëm, dhe një direktivë për “përfundimin e përdorimit politik” të agjencive federale ndaj kundërshtarëve politikë.
Falje për protestuesit e 6 janarit 2021/ Në mbrëmje, pasi u kthye në Shtëpinë e Bardhë si president, ai firmosi në Zyrën Ovale, urdhrin ekzekutiv për faljen e protestuesve të 6 janarit 2021. Sulmuesit e Capitol Hill, po mbahen në dënim në një burg të Uashingtonit. Presidenti tha se faljet e tij do të mbulonin “rreth 1500 njerëz, me falje të plotë”.
Fundi i “ius soli”? / Trump nënshkroi më pas një urdhër ekzekutiv për t’i dhënë fund të drejtës së shtetësisë me lindje, vendosur nga Kushtetuta e SHBA-së, të ashtuquajturin “ius soli”. Lidhur me emigracionin, ai shpalli gjithashtu një emergjencë kombëtare në kufirin jugor, duke aktivizuar përdorimin e burimeve dhe personelit të Pentagonit, që do të vendosen dhe do të përdoren për të ndërtuar murin kufitar.
Shpëtimi i TikTok / Ndër veprimet e para si president, siç njoftoi edhe vetë, Trump donte të shpëtonte TikTokun duke nënshkruar urdhrin ekzekutiv përkatës. “Është një aplikacion që e përdorin të rinjtë dhe nëse Kina vjedh të dhënat e të rinjve, sinqerisht, nuk është ndonjë problem i madh,” tha manjati në Zyrën Ovale. “Ne kemi probleme më të mëdha”.
Dalja nga OBSH / Siç ndodhi edhe gjatë mandatit të parë, Trump nënshkroi më pas urdhrin ekzekutiv për t’u larguar nga Organizata Botërore e Shëndetësisë. Presidenti është ankuar prej kohësh për sasinë e financimit për frymë që Shtetet e Bashkuara i japin OBSH-së, duke e krahasuar atë me shumën e parave që jep Kina.
Heqja e sanksioneve ndaj kolonëve në Bregun Perëndimor Ndër urdhrat ekzekutive të nënshkruara menjëherë pas marrjes së detyrës, spikat edhe heqja e sanksioneve ndaj kolonëve në Bregun Perëndimor.
Emri i ri i Gjirit të Meksikës Ndër urdhrat e parë të firmosur prej Trumpit, është edhe ai në lidhje me emrat e monumenteve dhe toponimeve amerikane, të cilat planifikojnë të riemërtojnë Denalin dhe Gjirin e Meksikës, një lëvizje e cila, sipas Shtëpisë së Bardhë, “ka për ta nderuar madhështinë amerikane”
