Ngjarja e rëndë e ndodhur pak pas mesnatës se djeshme në ambientet e televizionit “Top-Channel”, ku mbeti i vrarë roja i këtij televizioni Pal Kola, për momentin ka në verifikim vetëm dy persona.
Atentati që i mori jetën 60-vjeçarit Kola dhe dëmtoi rëndë fasadën prej xhami të këtij televizioni, ka krijuar bindjen se është organizuar nga një grup kriminal.
Por pavarësisht këtyre dyshimeve, aktualisht policia kriminale është duke “testuar” besueshmërinë e dy persona nga qyteti i Shkodrës.
Dy personat janë ndaluar në orën 03:00 të mesnatës, dy orë pas ndodhjes së ngjarjen në ambjentet e “Top-Channel” në Tiranë.
Ndalimi i tyrë është kryer në ikje e sipër, ku një patrullë e skuadrës “Shqiponja” ndaloi makinën. Për shkak se dy personat nga qyteti i Shkodrës kanë dhënë dëshmi kontradiktore, ata janë shoqëruar në ambjentet e policisë.
Vetëm në orën e mëngjesit, policia kriminale ka zbuluar se njëri nga personat e ndaluar rastësisht në orët e mesanatës në Vlorë, është ish-dhëndëri i viktimës Pal Kola.
Ai quhet Roberto Papçi nga qyteti i Shkodrës.
Është nga Bicaj i Pukës dhe dy vite më parë është divorcuar nga vajza e njeriut që mbeti viktimë në parkimin e televizionit “Top-Channel”.
Ende nuk ka një qartësim të plotë nga ana e policisë, nëse kemi të bëjmë me një sulm ndaj rrojes Pal Kola apo ndaj televizionit “Top-Channel”.
Nëse ka qenë krim brenda familjes, duket e habitshme pse eshte kryer në ambjentet e TCH. Goditja e fasadës së xhamit dhe vendrrojës, ngreh dyshime se objektiv i sulmit mund të ketë qënë Top-Channel. Dhe perdorja e disa makinave luksoze per nje krim kaq ordiner ne dukje, ngjall dyshime.
Sidoqofte, Roberto Papçi është ndaluar në Vlorë së bashku me një shokun e tij nga qyteti i Shkodrës. Ndalimi i tyre është kryer vetëm për verifikim, por në orët e drekës, policia kriminale ka urdhëruar transferimin e Roberto Papçit dhe shokut të tij në ambjentet e Drejtorisë së Policisë Tiranë.
Grupi i hetimit që po ndjek ngjarjen e rëndë, ka marë në pyetje Papçin por ky i fundit nuk ka pranuar të ketë lidhje me ngjarjen. Para oficerëve të policisë, Papçi, ka dhënë dëshmi të shkurtër, duke treguar se ka shkuar në Vlorë, për qef.
Ndërkohë të dy personave u është bërë testi i faktorëve plotësues, me qëllim gjetjen e grimcave të barutit të djegur në duar dhe rrobat e tyre. Deri në mëngjesin e sotëm, policia ende nuk është njohur me rezultatin e kësaj analize. Ndërkohë 4 aparatet telefonike të sekuestruar dy personave, po i nënshtrohen një ekzaminimi kompjuterik.
Hetimet janë në zhvillim e sipër.
*marrë nga ĢAZETA DITA
