E teksa temperaturat kanë nisur të ulen ndjeshëm dhe stina e ftohtë e dimrit po afron, dilema më e madhe e prindërve këtyre ditëve është të identifikojnë se çfarë po kalon fëmija i tyre, rrufë, ftohje, viroza të stinës apo covid-19? Nisur nga situata, MetropolPost iu drejtua mjekes pediatre Ilsa Kraja Mula, e cila na ofroi me shumë dashamirësi, disa orientime paraprake, të cilat i ndihmojnë prindërit të kuptojnë të vegjilit e tyre, duke u fokusuar tek ndihma dhe mjekimi i nevojshëm.
MetropolPost: Doktoreshë Ilsa, jemi në një stinë kur simptomat e një viroze stine mund të ngatërrohen fare mirë me ato të covid-19. Cfarë duhet të kenë parasysh prindërit në këtë kontekst?
Ilsa Kraja Mula, pediatre: Së pari nuk duhet të panikosemi në rast prezence të çfarëdo sinjali që mund të jetë i lidhur me covid-19.
Kolla, temperatura dhe rrufa, nuk konsiderohen ekskluzivisht simptoma të lidhura me covid-19, duke qenë se jemi në stinën e vjeshtës dhe me rifillimin e shkollës e të aktiviteteve jashtëshkollore, fëmijët, në mënyrë të pashmangshme bien në kontakt me virozat e stinës. Në ndryshim nga muajt e pranverës, ku predominonte varianti Delta i virusit, shumë ngjitës, aktualisht qarkullojnë një sëre virusesh, ndër të cilat ato që lidhen me rrufën e zakonshme, ndërkohë që shume shpejt pritet të vije edhe virusi i gripit.
Aktualisht, në spital janë të shtruar një numër i madh fëmijësh, me simptoma të lidhura me infeksione nga virusi respirator sincicial, si bronkioliti apo pneumoni të lidhura me viruse te tjera. Shumica e viruseve respiratore që po qarkullojnë aktualisht (si në periudhën precovid), kane një ngjashmëri klinike me simptomat e covid-19 dhe kjo e bën të vështirë diagnozen diferenciale. Këshillat më të zakonshme që ju japim prindërve, në këto kushte, janë: nëse fëmija shfaq rrufe dhe hundë të zëna apo që rrjedhin, ndonje episod me kollë apo dhimbje fyti, pa simptoma të tjera, atëherë mund të konkludojme pothuajse me siguri, që kemi të bëjme me rastin e një rrufe të zakonshme. Nëse fëmija shfaq edhe simptoma të tjera, si për shembull temperature mbi 37.5 gradë, apo simptoma gastro-intestinale (të vjella dhe diarre), atëherë është e drejtë të dyshojmë për një infeksion nga covid-19. Në përgjithësi, kur simptomat janë të izoluara, vetëm kollë apo vetëm diarre, apo të vjella, me shumë mundësi kemi të bëjmë me virozat e stinës.
Rrufa nuk duhet t’i trembë prindërit. Në këtë rast kujdesi duhet treguar në drejtim të pastrimit sa më të shpeshtë të hundës me solucion fiziologjik, dhënies së paracetamolit apo ibuprofenit në rast temperature, lëngje sa më shumë nga goja, ajrosje sa më e shpeshtë e dhomës dhe qëndrim në kushte shtëpie për të pakten 3 ditë. Nëse situata persiston mbi 3 ditë, temperatura vjen duke u shtuar si intensitet dhe nivel, kolla shtohet apo të vjellat e diarrea nuk kanë tendencë të reduktohen, atëherë të konsultohet me patjetër mjeku pediatër.
Kujtojmë që kjo ështe edhe periudha e alergjive nga ambrosia, e cila mund të provokojë kriza astme (bllokim dhe fërshellima në frymëmarrje). Në këto kushte, është e rëndësishme që të kontaktohet pediatri. E rëndësishme është që të analizohen simptomat tek femijët pa u futur në panik dhe të mundohemi ta trajtojmë infeksionin në mënyren e duhur.
