Kreu i qeverisë Rama ka paralajmëruar të gjithë krerët e bashkive në vend, se nëse nuk u japin fund abuzimeve me prokurimet publike, ata që kapen do të përfundojnë në SPAK. Në fjalën e tij kreu i qeverisë e vuri theksin tek paketa e re ligjore për prokurimet, e cila, sipas tij, o vetëm do të rrisë ndjeshëm eficencën e sistemit, po edhe integritetin dhe përgjegjshmërinë e të gjitha palëve në proces. Rama i ftoi krerët e rretheve ta studionin sa më parë me laps e letër këtë paketë të re ligjore, e po ashtu, për të mirën e tyre, të mos ndikonin në favor të ndonjë pale, në kurriz të tjetrës.
Edhe për prokurimet publike kam kërkuar reformimin e mëtejshëm, tha Rama, dhe pas një pune 2 vjeçare, së bashku dhe me ekspertë shqiptarë dhe ndërkombëtarë të fushës, për ta reformuar më tutje sistemin e prokurimeve publike, është miratuar dhe sapo ka hyrë në fuqi paketa e re ligjore në fushën e prokurimeve publike. Paketa e re përmirëson ndjeshëm kuadrin rregullator të prokurimeve publike në Shqipëri, dhe krijon premisat optimale për rritjen e efiçencës së sistemit, duke e përafruar atë shumë me legjislacionin evropian. Paketa e re synon të rris integritetin dhe përgjegjshmërinë e të gjitha palëve në proces, të kësaj pjese esenciale të makinerisë shtetërore, qoftë të autorititeteve kontraktore apo autoriteteve ekonomike, si dhe mbështet fuqizimin e mekanizmave monitoruesë e ndëshkues, për çdo shkelje të konstatuar. Ju ftoj të merrni sa më shpejt një laps në dorë, ta studioni këtë paketë e të kërkoni nga strukturat tuaja përgjegjëse të bëjnë të njëjtën gjë. Por mbi të gjitha ju sugjeroj miqësisht të mos përziheni me proceset e prokurorimit publik, të mos influencioni favorizimin e njërit në dëm të tjerit, të mos luani me një zjarr që do të bëhet gjithnjë e më përvëlues, kur drejtësia e re ka tërë mbështetjen time e të Partisë Socialiste, ndaj kujto ndër ju që do të luaje me zjarrin.
Me paketën e re ligjore, lexojeni, kryetarët e bashkive janë përgjegjës direkte për mirëmenaxhimin apo për keqmenazhimin e fondeve publike përmes prokurimit. Puna juaj si titullarë do të matet me a) numrin e pjesëmarrësve për procedurë, b) vlerën e kursyer në arkën e bashkisë; c) kufizimi drastik deri në eleminimin e procedurave me negocim, pa shpallje; d) realizimi i kontratave sipas kushteve në të cilat është zhvilluar procedura e prokurimit, theksoi Rama në fjalën e tij.
