Është botuar njëkohësisht në 26 vende të botës libri ‘Toka e Premtuar’ e ish-presidentit amerikan Barack Obama.
Sipas kritikëve të librit, ish-presidenti rrëfen në vetë të parë odisenë e pabesueshme të karrierrës së vet politike, përpjekjet qysh në moshë të re në kërkim të një identiteti si lider në botën e lirë, deri tek mandati i tij i parë presidencial, ku spikasin një sërë dinamikash e peripecish.
Teksa na sjell rrugëtimin pasionant, nga aspiratat politike si djalosh, deri në datën e paharrueshme të 4 nëntorit 2008, kur u zgjodh presidenti i 44-t i Shteteve të Bashkuara të Amerikës, duke u bërë afro-amerikani i parë në një detyrë të tillë, kritikët na thonë se ai reflekton mbi presidencën dhe i propozon lexuesit eksplorimin e mundësive të mëdha, por edhe kufijtë e një pushteti kaq të pamatë, duke ofruar prespektiva të reja shikimi, mbi dinamikat e konfliktit politik amerikan dhe diplopacinë ndërkombëtare.
Një vend të veçantë në libër zënë bashkëshortja e tij Mishela dhe dy vajzat, për të cilat Obama rrëfen kushtëzimin e jetës që u bëri me këtë zgjedhje.
Nuk dihet se kur ky libër do vijë në shqip apo nëse është në proces botimi. Ajo që dihet, është që botuesi amerikan Crown, ka porositur shtypjen edhe të 1 million kopjeve të tjera në Gjermani, veç 3 milionë kopjeve të tirazhit të parë.
