Në takimin e sotëm përballë gazetarëve, ministrja e Shëndetësisë bëri me dije situatën kritike ku gjendet vendi për hir të covid-19 dhe masat që Komiteti Teknik i Ekspertëve ka marrë për një periudhë dy javore, nisur nga nesër 11 shkurt, deri më 26 shkurt.
Jemi në një moment sa delikat aq edhe të rëndësishëm, u shpreh Manastirliu. Jemi në një situatë, kur, me gjasa edhe prej varianteve të reja, kemi edhe një shtim të rasteve. Jemi në një kohë kur kushtet atmosferike, dhe jemi në mes të dimrit, e bëjnë edhe më të pafavorshme situatën. Jemi në një situatë kur kemi një shtim të numri të infektimeve, kemi ulje të moshës së të prekurëve, si rrjedhojë edhe e relaksimit pas festave të fundvitit, gjë që ka sjellë edhe një shtim të ndjeshëm të misioneve të urgjencës kombëtare, të misioneve në banesë, të transferimeve në spitale, situatë që ditët e fundit është shoqëruar me shtim të rasteve në spitale dhe rritje të numrit të pacientëve në terapinë intensive.
Komiteti Teknik i Ekspertëve, vazhdoi ajo, pasi ka vlerësuar, sikurse e dini, mbi baza ditore situatën epidemiologjike, duke ndjekur në dinamikë gjithë treguesit epidemiologjikë dhe kriterët e riskut, mbi bazën e një analize shumëplanëshe, bazuar dhe në eksperiencat e fituara gjatë ketyre muajëve mbi impaktin e masave të intensitetit mesatar, ka vendosur në mbledhjen e ditës së sotme […] këto masa:
- Ndalimi i lëvizjes së qytetarëve nga ora 20.00 deri në orën 6.00 të mëngjesit, me përjashtim të emergjencave shëndetësore dhe për arsye pune, e cila do të jetë për një periudhë 14 ditore, duke nisur nga dita e enjte, pra nesër, datë 11 shkurt deri më 25 shkurt.
- Ndalimi i aktiviteteve të bareve, restoranteve, klubeve nga ora 20 e mbëmjes deri në 6 të mëngjesit, me përjashtim të shërbimit delivery, që nga dita e enjte, dt. 11 shkurt, deri në dt. 25 shkurt
- Nisur nga shtimi i rasteve të infektimeve të reja në grupmoshën 15-24 vjeç, shkollat e mesme, në zonat e riskut të lartë ku përfshihen bashkitë Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamëz, do të aplikojnë skenarin e tretë, pra atë të mësimit onlajn, për periudhën 11 shkurt deri në 26 shkurt,
- Sezoni i provimeve për universitetin rekomandohet të zgjatet, për të siguruar kombinimin e provimeve onlajn dhe atyre në auditor, për lëndët që kërkojne me domosdoshmëri prezencën, sipas vlerësimit të bërë nga ministria e Arsimit, Sporteve dhe e Rinisë, duke zbatuar rreptësisht protokollet anti-covid.
Ministrja Manastriliu theksoi se si për masat ekzistuese, si për të rejat, nuk do të ketë asnjë tolerancë për moszbatimin e tyre apo protokolleve anti-covid: Task-forca anticovid do jetë 24 orë në terren, u shpreh ajo, për të monitoruar zbatimin e masave në cdo cep të vendit. Dy javët e ardhshme janë javë vendimtare. Janë vetëm dy javë, dhe nga gjithësecili kërkohët një sakrificë. Gjatë këtyre dy javëve do do vendoset nëse do kemi shtrëngim të mëtejshëm të masave, apo lehtësim të tyre. E kuptoj, kuptojmë, të gjithë shqetësimin, por e kam thënë dhe e rithem, në piramidën e të drejtave, shëndeti është dhe do të jetë në majë të saj. Shumëkush mund të jetë lodhur, por virusi jo.
