Ministrja e Arsimit Kushi u ka bërë thirrje të gjithë profesorëve dhe atyre që kanë një arritje në karrierën akademike, të aplikojnë pranë Agjencisë së Sigurimit të Cilësisë në Arsimin e Lartë (ASCAL), si për pozicionin e kreut të këtij institucioni, ashtu edhe për atë të 11 këshillëtarëve të tij.
Jam sot këtu, tha Kushi, për të bërë një thirrje të hapur për të gjitha ata përfaqësues të botës akademike, brenda dhe jashtë vendit, që duan të japin një kontribut me vlerë për arsimin tonë të lartë në Shqipëri, sepse rritja e cilësisë së arsimit të lartë dhe përafrimi I standardeve më të mira europiane, është një prej objektivave më madhore tët mandatit të ri qeverisës, mbështetur edhe në Strategjinë e re kombëtare të Arsimit, 2021-2026, e cila aktualisht është në fazën e konsultimit publik dhe do të miratohet së shpejti.
Në funksion të këtij objektivi, ne synojmë të hapim dyert e universiteteve tona për bashkëpunim të ngushtë me universitetet më prestigjoze europiane, dhe të krijojmë kushtet që në të ardhmen studentët tanë të mund të marrin diploma europiane këtu në Shqipëri, e në këtë mënyrë t’i pajisim ata me dije e me aftësi të konkurueshme me studentët e BE-së.
Sipas ministres Kushi, 3 deri në 5 nga anëtarët e ASCAL-it duhet të jenë të huaj. Të interesuarit mund të shpien një letër motivimi dhe CV përkatëse, në faqen e Ministrisë së Arsimit, ku gjenden edhe të dhënat e aplikimit.
