Këshilli Kombëtar i Partisë Demokratike mbledhur mbrëmjen e djeshme, ka pasur fokus zgjedhjet e brendshme në PD, e po ashtu edhe kërkesat e një pasnjëshme për dorëheqjen e parevokueshme të kreut aktual të saj, Lulëzim Bashës.
Përveç Fatbardh Kadillit, i cili ka shpallur publikisht kandidaturën e tij për të qenë në krye të PD-së, një zë kritik ndaj Bashës, pro dorëheqjes së tij dhe reformimit të PD-së, ka qenë edhe ish presidendi Bujar Nishani. Në fjalën e tij në mbledhjen e Këshillit Kombëtar të PD-së, Nishani kërkon veç dorëheqjes së parevokueshme të Bashës, edhe një reformim rrënjësor të Partisë Demokratike, në mënzrë që ajo të shkojë drejt fitores dhe marrjes së pushtetit.
E vetmja alternativë është nisja e një projekti të ri politik, shprehet Nishani. Kam kërkuar dhe përsëris më së pari dorëheqjen e parevokueshme të Kryetarit të Partisë! Dorëheqja e parevokueshme e kryetarit është akt i përgjegjësisë politike, është akt i maturimit politik, është akt civilizimi, është sakrificë personale për t’i shërbyer interesit madhor të së ardhmes së partisë. Eshtë akti që verifikon se interesi i Partisë është mbi interesin personal të cilitdo individ që është kryetar. Thirrja ime për këtë akti civil prej z. Basha është pikërisht si një shërbim që z, Basha ka për detyrim ti bëjë Partisë Demokratike. Procesit të së ardhmes së saj.
Po a e zgjidh pikën kritike vetëm ky akt për PD? Jo, natyrisht që jo. Por është një hap që relakson kaosin e shkatuar nga humbja e besimit se PD mund të fitojë zgjedhjet dhe pushtetin një ditë! Eshtë një hap që tregon se PD mund të vijojë të ringrihet mbi modelin dhe praktikën evropiane, se ne mund të bëhemi një Shtëpi e Madhe e Lirisë! Kjo kërkon të hyjmë në një proces jo të lehtë, jo të shkurtër por të domosdoshëm reformimi. Nevojitet menjëherë të ngrihet një komision i besueshëm, me integritet, me eksperiencë dhe përfshirës për të drejtuar e menaxhuar këtë proces. Duke filluar me hapjen e analizës në bazën e parties, nga seksioni deri tek dega. Të nisë puna për një statut të ri ku të rikonsiderohet tërësisht procedura dhe formula e zgjedhjes së Kryesisë së partisë dhe KK. Të krijohet Senati i partisë përveç Kryesisë e KK. Të futet institucioni i Referendumit në parti, si dhe të sanksionohet dorëheqja e parevokueshme e kryetarit te parties, në rastin e humbjes në zgjedhjet parlamentare, ka thënë mes të tjerave Nishani.
