Situata e rëndëruar e kovidit në vendin fqinj, mban mbyllur deri më datën 8 mars 2021, pikën doganore të Kapshticës.
Lajmin e ka bërë të ditur Dogana Shqiptare, e cila, në lajmërimin zyrtar njofton se autoritetet e Policisë greke pikës kufitare në Kristalopigi, kanë njoftuar shtyrjen e afatit të mos hapjes së pikës së kalimit kufitar Kapshticë deri në datën 8.3.2021.
Deri në këtë datë, thuhet në njoftimin e Doganave Shqiptare, dalja nga Shqipëria dhe hyrja drejt Greqisë nëpërmjet kësaj pike kalimi, vijon të jetë e mbyllur. Ndërsa dalja nga Greqia dhe hyrja drejt vendit tonë, do të jetë e lejuar nga ora 06:00 deri në orën 22:00, vetëm për këmbësorët dhe mjetet e tonazhit të rëndë (kamiona mallrash). Mjetet si autobusa, taksi, apo çdo mjet tjetër i transportit të pasagjerëve, nuk do të lejohet të kalojë. Për të gjithë qytetarët dhe bizneset njoftojmë se Dogana e Kakavijës vijon punën normalisht.
Kujtojmë që pika e Kapshticës u mbyll 20 Nëntor të 2020-s, po për të njëjtat motive.
