I shumë debatuar si gjest, dora lartë e Elon Musk gjatë përshëndetjes mbajtur në ceremoninë e betimit të Trump, nuk është gjë tjetër vecëse shenjë e autizmit të tij. Të paktën kështu thonë ata që e njohin nga afër Muskun, duke e cilësuar lëvizjen si një gjest për të thënë që “zemra ime është me ju”
Musk doli në skenë, kërceu dhe më pas lëshoi një “Po” të gjatë, përpara se të fillonte fjalimin e tij prej rreth katër minutash, ku falënderoi votuesit që mundësuan kthimin e Trumpit. Pastaj foli për “një moment kthese për qytetërim”, duke përmbledhur atë që Presidenti i sapozgjedhur kishte thënë tashmë, duke shtuar: “Kjo është shija e fitores”. Përpara se të largohej, ai përshëndeti të pranishmit duke thënë se “zemra ime është me ju”, duke rrahur dorën e djathtë në gjoks dhe zgjatur krahun me pëllëmbë të hapur, gjest i përsëritur dy herë.
Shumica e komentuesve flasin për një “përshëndetje naziste dhe mjaft agresive”. Ka nga ata që bëjnë shaka për gjoja “stërvitje para pasqyrës”, apo nga ata që thonë se “ishte një gjest i sikletshëm në një moment entuziazmi”. Gazeta izraelite “Haaretz” dhe britanikja “The Guardian”, shkruajnë se Musk ka bërë në mos një përshëndetje “fashiste”, më e pakta “të stilit fashist”.
“Elon Musk e dinte saktësisht se çfarë po bënte me këtë përshëndetje fashiste romake në tubim – e cila vjen në kontekstin e aderimit të tij nëpër politikat dhe partitë e ekstremit të djathtë”, u shpreh në një deklaratë Amy Spitalnick, drejtore e organizatës hebraike JCPA.
Shoqata ADL, e cila lufton kundër antisemitizmit e që është përplasur me miliarderin në të shkuarën, këtë herë e mbrojti: “Duket se Elon Musk ka bërë një gjest të ngathët në një moment entuziazmi, jo një përshëndetje naziste”. Sipas historianit Aaron Astor, përshëndetja e miliarderit nuk duhet të kategorizohet si naziste: «E kam kritikuar shumë herë Elon Musk që ka lënë neo-nazistët të ndotin këtë platformë. Por ky gjest nuk është një përshëndetje naziste. Është një shenjë e sikletshme e dorës nga një burrë autik, që i thotë turmës “zemra ime është me ju”.
Edhe Andrea Stroppa, krahu i djathtë i miliarderit, anëtarit më të ri të administratës së presidentit të 47-të të Shteteve të Bashkuara të Amerikës, pati disa hezitime. 30-vjeçari, këshilltar dhe bashkëpunëtor i pronarit të Tesla, fillimisht komentoi me entuziazëm në rrjetet sociale, duke u tërhequr më pas (duke fshirë postimin ku edhe ai përshëndeti rikthimin e “Perandorisë Romake dhe përshëndetjes romake”), duke mbështetur se “ajo që shumë e morën për një përshëndetje naziste, është thjesht Eloni, i cili është autik, duke shprehur ndjenjat e tij duke thënë “Ju jap zemrën time”. Dhe pikërisht këtë tha në mikrofon”.
Kjo tezë në vija të trasha u rimor edhe nga Musk, i emëruar në krye të Departamentit për Efiçencën e Qeverisë (Doge), i cili, në X, u mbrojt duke thënë: «Sinqerisht, ata duhet të përdorin truke të pista më të mira.
Autizmi i Musk
Vetë Musk njoftoi se vuante nga një sindromë e spektrit të autizmit në një episod të vitit 2021 të programit të famshëm televiziv amerikan “Saturday Night Live”: «Po bëj histori, sepse jam personi i parë me sindromën Asperger që drejtoj shfaqjen. Ose të paktën i pari që e pranon.” Megjithatë, edhe në atë moment, miliarderi e kishte ndarë publikun mes atyre që e lavdëronin guximin dhe atyre që pretendonin se ishte thjesht një lëvizje për të kënaqur veten me audiencën. “E di që them dhe postoj gjëra të çuditshme në rrjetet sociale, por truri im funksionon kështu. Ndonjëherë, pasi them diçka, më duhet të nënvizoj se përse e kam fjalën”, vazhdoi ai në monologun e tij.
Abuzimi me drogën: “Ketamina e përshkruar nga mjeku”
Musk thotë dhe bën gjëra të çuditshme dhe në vitin 2021 disa këshilltarë në bordin e drejtorëve të Tesla-s kishin insinuuar se, përveç sindromës së Asperger-it, sjellja e tij tepër e lartë mund të ndikohej nga abuzimi i substancave narkotike, duke përfshirë «LSD, kokainë, magjia e kërpudhave dhe mbi të gjitha “ketamina”.
Ambiciet politike
“Nga këndvështrimi i një investitori, nëse jam duke marrë diçka, duhet të vazhdoj ta bëj këtë. Ajo që ka rëndësi për Ëall Street, është ekzekutimi”. Një ekzekutim fitues ky, duke qenë se që kur u hodh në krahun e Trump, ka fituar 114 miliardë dollarë. Një pozicion politik që Musk duket se dëshiron ta shtrijë jashtë shtetit, ndoshta duke u bërë lideri dixhital i së djathtës së re globale. Musk përdor fuqinë e tij të madhe mediatike, për të përhapur idetë e krahut të djathtë dhe për të ushqyer ambiciet e tij politike. Në Evropë ai ka marrëdhënie të ngushta: në Itali me kryeministren Meloni, në Austri kryeministrin e mundshëm të ardhshëm, në Francë me Zemmour dhe në Gjermani i ka ofruar X liderit të “Alternative für Deutschland”, që në shkurt mund të jetë partia e dytë gjermane; ai po përpiqet gjithashtu të rrisë ndikimin e tij në Mbretërinë e Bashkuar, ku prej muajsh ka sulmuar kryeministrin Starmer dhe po ashtu edhe ish-aleatin e tij, liderin historik të krahut të djathtë Farage.
