Ish-moderatoja aq e shumë njohur Albana Osmani, ka nxjerrë në treg romanin e saj të parë me titull “Çika – në betejë me inteligjencën artificiale”, një roman i cili i përket zhanrit fantastiko-shkencor dhe është i mbushur me vizatime të vetë moderatores.
Libri shquhet për ngjyrën e veçantë blu me të cilën paraqitet grafikisht, mbi të cilin spikasin gërmat e arta të fjalës cika, e cila në gegërisht, përdoret për të emërtuar vajzën.
Sipas informacionit të vetë ish-moderatores Osmani, në faqen e saj, në libër rrëfehet për botën në vitin 2117… Planeti Tokë ka pësuar ndryshime të paimagjinueshme. Një rendi i ri, i drejtuar nga qeveria ndërplanetare, është vënë prej kohësh në kërkim të elementit që do t’u sigurojë fuqinë dhe epërsinë e plotë. Pjesëza e munguar fshihet te një vajzë, i është tejçuar asaj kohë më parë, aty në cepin idilik mes maleve.
Një nga surprizat e këtij botimi, janë edhe vizatimet e librit kryer prej vetë autores, e cila është shprehur gjatë intervistave të ndryshme në media, se i ka ngjizur pikërisht me dëshirën që lexuesi ta shohë krijimin e saj, jo vetëm ta lexojë.
Tashmë libri gjendet në të tëra libraritë në Shqipëri, Kosovë e Maqedoni, e së shpejti pritet të dalë edhe në variantin anglisht.
