Në një lidhje direkte prej faqes së tij publike, Rama deklaroi se janë duke u konsultuar rregulloret e disa prej qyteteve të mëdha si Barcelona apo Kopenhageni, e se mjaft shpejt formula e përzgjedhur, bashkë me detyrimet e ndëshkimet, do t’u bëhet me dije të tërëve.
“Sot është 1 gusht. Dje ka skaduar afati për tërheqjen e të gjitha llojeve të rraqeve buzë rrugëve kombëtare, dhe nga sot duhet të fillojë hap pas hapi ndërhyrja e forcave përkatëse e kontrollit mbi territorin“, deklaroi Rama. “Ambicja jonë është që të jemi kampionë të Ballkanit në turizëm. Kemi arritur të bëjmë shumë në vitet e fundit e jo më larg se sot paradite më dërguan një raport për mirëqeverisjen, po që bën edhe për qeverisjen, nga ” Chandler Institute” në Singapor, që e vlerësonte Shqipërinë si një nga yjet në ngjitje në Evropë në qeverisje. E thonë ata, se ne nuk kemi kushërinj dhe nuk kemi influencë në institutin e qeverisjes në Singapor. Qeverisja në Shqipërsië vlerësohet bashkë me Italinë, Lituaninë etj, por gjithsesi, forcat përkatëse do duhet të angazhohen shumë më tepër tash e mbrapa, se na duhet t’i japim një cilësi të re vendit tonë si një destinacion turistik, por edhe si një shtet i së drejtës, për t’u bërë anëtarë të BE.
Dua t’i siguroj të gjithë që ky nuk është aksion. Kjo është një përpjekje e pandalshme, për një mënyrë të re të të qëndruarit së bashku. Ka disa që thonë, pse u kujtuat tani! Unë nuk jam kujtuar tani. Jam kujtuar që ditën e parë kur mora votën e parë në dymishin, ose ditën e parë që kam hyrë në një zyrë shteti si ministër i Kulturës, kur mora disa fëmijë dhe pastrova e pikturova disa teneqe që ishin aty në zonën ngjitur me ministrinë e kulturës, ku sot janë vëllezërit Frashëri në Bulevard. Pra jo vetëm që nuk jam kujtuar tani, por jemi kujtuar me kohë, por ky është një prces.
Sot janë shtrirë kuturu ngrehina të përkohëshme, pa leje, dhe të gjitha do të kthehen mbrapsht. Natyrisht, në anën tjetër shoh disa që ankohen, jo po hoqët tendat jo po mbetën karriget, se është Tiranë, Shqipëri jo Teheran Iran. Ne nuk kemi dalë për të rrënuar bizneset e vogla, por për të vendosur kufirin që trotuari është i qytetarëve, dhe në një pjesë të tij edhe kafene, natyrisht për ata qytetarë që duan të ulen të pinë një kafe, por nuk mundet që nënat me karroca të kalojnë përmes karrigeve, nuk mundet që të moshuarit të mos ulen gjëkundi brenda lagjeve, sepse aty dikush ka venosur një tra e ka vendosur të mbledhë lekët për një parking, apo dikush ka vendosur të lidhë një zorrë për ndonjë lavazh. Por duhet durim, sepse janë shumë, e po ashtu duhet durim edhe për faktin që disa nuk marrin vesh. Ti shkon e heq, i thua shtyu këtu, ai shtyhet më para. Dhe gjitha kjo, do të adresohet hap pas hapi…
Çfarë po bëjmë ne? Ne po bëjmë “Rregulloren kombëtare”, e cila vendos qartë kufijtë. Kemi studiuar rregulloret e shumë qyteteve si Barcelona apo Kopenhageni, ca i kanë 1.8 metra, ca 2 e ca 2.5 metra, se sa duhet të jetë bosh. Ka qytete të tjera që i kanë me formula të tjera, por ne do t’i bëjmë shumë të qarta këto, ashtu siç do t’i bëjmë shumë të qarta për të gjithë, edhe detyrimet e ndëshkimet.
Do të hapet edhe një portal i posacëm “Mundësia ime”, se kjo është një betejë e vazhdueshme, derisa të ndahet mendja që kjo nuk bëhet, siç u nda për Lanën, apo që nuk mund të shtyhesh përtej kufirit ku fillon jeta e komunitetit“, tha Rama mes të tjerave.
